Geschenk für den Narrenvater: Ein T-Shirt von den besten Helfern
Geschenk für den Narrenvater: Ein T-Shirt von den besten Helfern
Ein Hauch vom Ringtreffen wehte durch das Narrenheim: Pizzabäcker Lorenzo sorgte für italienische Verpflegung und Schnapslieferant Siebert steuerte zwei Flaschen Jacky bei. Nicht verwunderlich also, dass beim Helferfest der Narrenzunft gute Stimmung herrschte.
Gut gefüllt war das Narrenheim...
... mit den üblichen Verdächtigen...
... ein paar sogar trotz "sommerlicher" Temperaturen draußen.
Pizzabäcker Lorenzo wurde es jedenfalls nicht kalt bei seinen Öfen.
Wer sich so vorbildlich in der Nachwuchsarbeit engagiert darf auch gemütlich ins Warme sitzen.
Und Narrenschultes Wolfgang kann sich noch darüber freuen, dass seine Heike einen größeren Bauchumfang hat als er. Noch.
Schon früh machten sich bei manchen Anzeichen wachsender Müdigkeit bemerkbar.
Bei lecker Pizza kann man aber eigentlich nicht müde werden.
Diese Herren schauen noch recht munter aus.
Fast schon hyperaktiv: Nico, der kleine Italiener, Sohnemann von Lorenzo.
Martina Ott überreichte Benno nach dessen ergreifenden Ansprache als Zeichen der Anerkennung ein T-Shirt.
 |
 |
| Vorne | Hinten |
Martina trug dann ihre Nachgedanken zum Ringtreffen in Reimform vor (siehe unten).
Über das gelungene Fest freute sich auch Spirituosen-Tycoon Siebert.
Nachgedanken zum
Ringtreffen
von Martina Ott
Kaffee, Handy ond Zigretta
ond drhoim verlassne Betta.
Dr Benno juckt wia`s HB Männle rom
ond scheicht seine Helfer em Krengel rom.
Blanke Nerva, der Ma hot koi Ruah,
so manche hoißt ma : du blede Kua.
Doch au der Stress goht mol vorbei
i hoff, du warsch zfrieda mit deim Verei.
S war schee bei ui, war a tolles Fescht,
so sagat beim Hoimganga älle Gäscht.
Daß ma a Ringtreffa durchzieha ka,
fängt scho friah ma dia Planung a.
S geit viel zum organisiera für da Verei,
a Johr vorher, die Zeit muaß scho sei.
En Inneringa aber, do goht´s andersch zua,
bis Mitte November hand d´Helfer no Ruah.
Die Sägehalle isch jo do, koi Problem,
ma hots trocka ond warm ond des isch doch scheen.
Dia Erfahrung beim Plana isch au do, wohl wohr,
ma hot jo scho 2 Ringtreffa ghet, vor a paar Johr.
Des Johr goht noch rum, dr Herbscht isch vorüber
noch goht dr Benno end Kampfplanung über.
Klos und Wasser und a Hoizong muaß her,
dr Strom sott fließa ond no vieles mehr.
Doch dr Benno isch a Organisationstalent,
telefoniert oifach rom und jeder rennt.
Du guckasch om des und du om sell,
dia Zeit bis zom Ringtreffa vergoht rasend schnell.
Damit ma dia Halla abtrenna ka,
hengt ma oifach a Silofolie na.
Dr Hannes isch dofür dr richtige Ma,
der moit, weil dia jo au it brenna ka.
Ein Mann, ein Wort, es folgat Tata,
doch auf des Ende, do kasch wata.
Dr Sicherheitsbeauftragte aus Sigmaringen Stadt,
der macht den guata Plan glei platt.
Der zündet oifach dia Folie a,
des Glomb fängt au no zom brenna a.
Dia Tropfa keiat brennend ra,
des isch an Scheiß, des Zuig muaß na.
Des End vom Liad, so kas halt gau,
Zeltplana dants zom Abtrenna au.
Dia Halla isch riesig, des nemmt ma en Kauf,
dr Aufbau gleicht ama Marathonlauf.
Dia Kilometer, dia ma do glaufa isch
bis älles griecht war, mitsamt Benk ond mit Tisch.
Doch bleibt ma jong ond fit drbei,
ond dia Faule fahret mit em Busle end Halla nei.
Bloß ois war it schee, an richtiger Graus,
schmeißat dia alte Feschtbendel raus.
Fürs nächste Mol muß ma sich Gedanka macha
ond aschaffa a weng nuiere Sacha.
Vom Lierafeld kommat noch em Ringtreffa Griaß,
weil jeder holat Einlage gega Plattfiaß.
Friteusa, Herd ond Spülmaschina
ka ma bloß mit Strom bediena.
Dr Joda muaß als Vereinsstromer her,
ond manchmol duat der sich ganz schee schwer.
Dia viele Lampa, Kabel ond Steckdosa,
hoffentlich goht des au it end Hosa.
Jeder braucht Strom, wia kriag i den her?
Dia Kabel und dr Gruscht wärd au emmer mehr.
Dr hot überlegt, dr Kopf hot schier graucht,
2 volle Paletta Zuig hotr braucht.
S hot Gott sei Dank klappt, des war eiser Glück,
dia Aufgab war, i glaub sei Moischsterstück.
Ond er hot des au wirklich ganz super gmacht,
wenn da´n geseha hosch, hot´r maischt drbei glacht.
Was duat ma mit em ganza Geld en dr Nacht?
So hand sich dr Berte ond dr Benno Gedanka gmacht.
Für des sotts was sichres, großes ond schweres sei,
die Masse an Geld isch nämlich it klei.
An Stahlcontainer kommt her, den ma aschliaßa ka,
doch „begehbarer Tresor“ hört sich doch viel besser a.
So warat dia Milliona sicher verstaut
ond koin Tresorknacker hot sich noch Inneringa traut.
Zum Sonntagsomzug kommat d´Leit ens Ort nei,
no sottats au scheene Eitrittsbendel sei.
A Kata, dia ma om da Hals henga ka,
do machat mir eis obends em Narraheim dra.
Dia Stapel send groß ond dia Schnür ewig lang,
etz sottat dia au bloß no an die Kata ran.
Was hand mir gschnitta ond gmacht a paar 1000 Knota,
bis ällne am Schluß weh toa hand dia Pfota.
Zom Trenka geits älles, des isch au ganz toll,
doch irgendwann isch jede Blos au mol voll.
Ma sott auf´s Klo zom biesala gau,
es plogat halt älle, Ma, Kender ond d´Frau.
Bei dr Planung kommt dia Frog noch au auf,
wie goht des eigentlich mit dem Klopapierkauf?
Für wie viel Leit kauft ma wie viel Papier?
Ond kauft ma´s mit 3 Laga oder mit 4?
Dr Mang hot am PC a Hochrechnung erstellt,
weil des älles kostet jo au no Geld.
A Frau braucht halt meh ond an Ma goht mol naus,
schlemm wär´s, beim Biesla goht´s Klopapier aus.
Auf dr Homepage konnt ma dia Rechnung noch seha
ond´s Papier hot guat glangat, s´isch no was übrig gwea.
Eingefrorne Wasserkäschta,
so kasch den Klowaga vergessa.
Do
muaß halt a Heizung nei,
noch däfs au warm wia en dr Sauna sei.
Dr Ottmar und dr Roland fraiat sich sehr,
bloß am nächsta Tag muaß fast no dia Feuerwehr her.
En dr Nacht fengt des Plastik a zom Schmora,
dia boide kriagat hoiße Ohra.
Weil se dia Heizung oifach vergessa hand,
hält dära Hitz so lang au koi Material stand.
A Gschmäckle war´s, wia ma so schee sait,
a Wonder, dass des koi Fuier geit.
An d´Kucheleit a ganz groß´s Lob,
dia hand au gmacht an harta Job.
Weil jeder Gast will ebbes essa,
ond´s Personal hot ma au it vergessa.
Des Fett schnell en´d Friteuse nei,
doch do fällt grad dr Birgit ei:
Oh, Heiland nei, i ka bloß hoffa,
dass dr Hahna isch it offa.
Der war´s halt doch, des war a Graus,
s´Fett lauft als Überschwemmung raus.
Schnell zua da Hahn, an Eimer dronter,
s´Fett wegputzt ond nochat ganz munter,
Pommes, Schnitzel ond au Wischt,
bis dr Bauch ganz vollgfressa ischt.
He Monde, guck, des Bierfass isch leer,
do
muaß ganz schnell a nuies her.
Ond dr Monde, an ganz gschicktr Ma,
der sticht wia an Profi des Fässle au a.
Doch, was isch des, jo ka´s au sei,
do hot ma doch bschissa eisern Verei.
Bloß Monde, paß auf ond prägs dir guat ei,
ema leera Fässle ka oifach koi Bier meh sei.
Dia Narragäscht warat ganz versessa,
ond hand Omenga vo leckerer Pizza gessa.
Dr Ofa ond d´Gsichter hand vor Schaffa ganz glüht,
bloß em Verein hot was ganz anderes blüht:
Em Benno hot´s schier d´Träna end Auga trieba,
mir send auf de Steaks ond Wischtla hocka blieba.
Wenn da heit gohsch in´s Narrenheim ond du hosch Duscht,
frogt ma de glei: Maasch au no a Wuscht?
Doch zur Hauptversammlung, ond des war ganz gschickt,
hot ma viele Wischt als Wuschtsalat verdrückt.
Ond irgendwann hot au dia letscht Wuscht verlora,
denn se hengat oim schier raus zu de Ohra.
Mir brauchat was für dia Seniora,
dia kriagats em Barzelt jo auf´d Ohra.
Laute Musik, verruckte Leit,
do schnappscht jo rom, hot dr Benno gsait.
A
„Altabar“ muaß end Halla nei,
wo ma gmiatlich trenka ka sein Wei.
Doch, Benno, au dia Alte lossata mol kracha,
Jacky,
Baccardi ond andere Sacha.
Des Zuig goht schnell aus, Nochschub muaß her,
dr Sieber Kalle konnt ins Schwitza wia an Bär.
Er isch am brenga ond immer am laufa,
mein Gott, was kennat dia Narra doch saufa!
Dr Hänger am Pickup, total überlada,
knack hot´s gmachtond ond er hot da Schada.
Dia Anhängerkupplung, dia hot´s gricht,
isch oifach abrocha, bei dem Gwicht.
So Typa fendasch au an ra Bar,
du denksch für di, isch des au wohr.
Do drenglat ma vor, über´d Theke hengt ma nei.
He, du, schenk mir schnell 2 Jacky ei!
Doch cool, wia mir send, sait ma bloß :Bua,
a bitzale höflicher ond in äller Ruah.
Beim nächsta Mol kasch´s glei probiera,
wias au wär mit a paar bessre Maniera.
Noch kommt der glei wieder, stoht end Roia au nei,
ond sait: Schatzi, schenk mir doch bitte 2 Jacky ei.
Jedesmol war er noch höflich ond nett
ond irgendwenn randvoll, halt reif für sei Bett.
Dia Bar isch ganz henda, dia Bühne weit fort.
Ma sieht gar nix ond ma vrstoht au koi Wort.
Doch d´Adelinde ond I, mir send jo it domm,
mir drehat oifach a Sprudelkischtle om.
Nix wia nauf ond durch a paar Lucka,
könnat au mir des Programm jetzt agucka.
Des Ringtreffa bei eis war wirklich ganz toll,
dia Halla ond´s Zelt warat grammlat voll.
Do trifft ma noch Leit aus vergangener Zeit,
so manche Jugendliebe, was oin au frait.
Arbeitskollega, alte Schulkamerada,
do muaß dia stressige Arbeit halt au mol wata.
Doch des Problem bei dära Gschicht:
Vergessat dia, wo mit euch schaffat nicht.
Dia miaßat au für euch etzt sprenga ond laufa,
denn jeder Gast kommt an´d Bar ond will was saufa.
Am Eigang standet schwaze Menner,
ond gucka dant dia, no viel strenger.
Irgendwenn spät hots au bei dene g´klappt
ond se hand au so an Bandita gschnappt.
Noch ruaft ma schnell no d´Polizei
ond frogt: Hand ihr no a Zelle frei?
Doch als der Ma noch übergäba war,
do war em Arno ond seine Menner schnell klar,
der Ma haut ab ond zwar auf dr Stell,
dia Polizei isch halt it emmr schnell.
Doch au dia Kucheleit warat it besser,
se warat schließlich bewaffnet mit riesige Messer.
Dia hettat en eigentlich überwältiga könna,
wenn scho d´Polizei moit, se miaßtat etzt penna.
Doch der Bandit, der war ganz schee fix,
macht sich aus em Staub, aus dr Verhaftung wät nix.
Dass dr Sonntagsomzug durchs Ort ka au laufa,
miaßt ma schier no a nuie Stroß kaufa.
S isch kalt ond weiß, es isch halt no Wentr,
doch eisr Bürgermeister klemmt sich drhentr.
Jetzt machat mol zua, do hilft älles nix mehr,
ond bätschat auf´d Stroßa endlich da Teer.
Des klappt noch au guat ond wia ka´s anders sei
weiht der mit em AWB glei da Bauabschnitt ei.
Dr Zug ka noch über dia nuie Stroß laufa,
ond weil’s kalt war, goht ma drnoch an Glühwein kaufa.
Doch irgendwann isch au des Fescht vorbei,
no loht ma au 5e mol grade sei.
Dr Benno sait: Ihr liabe Leit,
gnuag gschaffat, Schluß für heit!
Mir lands etzt ausklenga, dr Stress isch rom,
jetzt heng i no jedem a Medaille om.
Dr Sekt, dr Schnaps ond dr Jacky hand g´lockt,
no isch ma no lang so beinander g´hockt.
Ma hot gschwätzt, gsonga und au viel g´tronka,
s war saugmiatlich, halt a paar scheene Stonda.
Wenig Schlof g´het, dr Maga wenig zom Verdaua,
koi Wonder, des muaß am Sonnteg jo haua.
Beim Hoimganga war des Elend noch groß,
wia fend i em Donkla mein Hoimweg bloß?
Am nächsta Morga, i glaub, i han reacht,
dia letschte Schnäps beim BD ond beim Joe warat schleacht.
Ond bei manche moisch, des Hirn schaltet aus,
dia wachat grad auf em a ganz fremda Haus.
Oh Heimatland, wo ben i bloß?
Auf oimol isch dia Vrzweiflung groß.
Doch Hannes, so goht´s halt zua auf dr Welt,
ond nächscht Mol kriagscht halt an Wegweiser gstellt.
Des Ringtreffa war guat ond dia Stimmung war toll,
ond älle Gäst des Lobes voll.
Mir warat älle fleißig ond hand au viel gschafft
ond so manche Nacht hot ma zom Tag au gmacht.
Benno, woisch, du ruafsch oifach a,
ond jeder kommt ond stoht sein Ma.
Etzt hot´r denkt, wia kennt i dene Leit,
danke saga ond dene macha a Fraid.
Denn jeder von uns hot doch gea des Bescht,
drom hand mir vrdient au des Helferfescht!